NIDINA IFOTONY NANKAHERY SY NITONDRA FANAMPIANA HO AN’IREO TOKANTRANO TRABOINA TAORIAN'NY FANDALOVAN'NY RIVODOZA HONDE TAO AMIN’NY FARITRA ATSIMO ANDREFANA NY FILOHAN’NY REPOBLIKA
Nidina ifotony nankahery sy nitondra fanampiana ho an’ireo tokantrano traboina taorian'ny fandalovan'ny rivodoza Honde tao amin’ny Faritra Atsimo Andrefana ny Filohan’ny Repoblika. Anisan'ny tena nitondra takaitra tamin'iny Faritra iny tao Ampanihy, Itampolo sy Androka izay nanombohan'ny Filoha Andry Rajoelina ny fitsidihana nataony. Nidina an-tsehatra koa izy nandrindra ny fizarana ireo fanampiana entin'ireo tokantrano hiatrehana ny voina mahazo azy ireo toy ny vary, menaka, voamaina, sira, siramamy, sns.
Nanome toromarika ny Filoha ny ampiasana ireo angidimby an'ny Tafika hanafainganana ny fitaterana ireo fanampiana indrindra amin'ireo kaominina mitoka-monina noho ny fahatapahan'ny lalana.
“Rehefa misy voina mahazo ny mpiray Tanindrazana dia tsy maintsy mijery sy manohana ny mpitondra. Amin'ny andro sarotra no tena ahitana ny tena Raiamandreny ary izaho tsy manadino anareo”, hoy ny Filoha.
𝐿𝑜ℎ𝑎𝑟𝑎𝑛𝑜 𝑠𝑦 𝑠𝑎𝑟𝑦: PRM
