BASE TOLIARA VONONA HIFANOME TANANA NY RAY AMAN-DRENY SY NY MPANAO POLITIKA ATY AN-TOERANA HO AN' IO TETIKASA IO: MCC

BASE TOLIARA VONONA HIFANOME TANANA NY RAY AMAN-DRENY SY NY MPANAO POLITIKA ATY AN-TOERANA HO AN' IO TETIKASA IO

𝑳𝒂𝒑𝒂𝒏'𝒊 𝑴𝒂𝒉𝒂𝒛𝒐𝒂𝒓𝒊𝒗𝒐
[𝑭𝒂𝒉𝒂-11 𝒂𝒗𝒓𝒊𝒍𝒚 2025]
Naharitra ora dimy ny fihaonana teo amin’ny Praiminisitra, Lehiben’ny Governemanta Ntsay Christian sy ny delegasiaona izay notarihiny teto Toliara androany tamin’ireo Raiamandreny, mpanao politika, olom-boafidy, tomponandraikitra ary rantsana rehetra voakasiky ny “Base Toliara”. Fifanazavan-dresaka sy fifampizarana izay mety ho tombony ho azo avy amin'ity tetikasa lehibe ity no natao nandritra izany, satria tsapa fa zava-dehibe ny fifampihainoana sy ny dinika atao ao anatin’ny hitsim-po hoy ny Praiminisitra, mba hivoahana amin’ny tsy fahalalana ny tena zava-misy, ny ahiahy tsy hihavanana, ary ny tsy fitoviam-pijery ka miteraka disadisa eo amin’ny samy Malagasy. Fanamby lehibe mantsy hoy izy, ny fanaovana izao dingana hisian’ny dinika izao, mba hampanjary avy hatrany ny fampandrosoana amin’ny alalan’ny fanatanterahana ny vinan’ny Filohan’ny Repoblika Andry Rajoelina, miompana amin'ny fampiroboroboana ny indostria aty amin’ny Faritra Atsimo Andrefana. Nahatsapa ny rehetra fa mangetaheta izany rahateo ny vahoaka, araka ny fanehoan-kevitry ny ankamaroan’ireo izay nanatrika ity fihaonana ity, eny fa na dia ireo olona tsy mitovy fijery ara-politika amin’ny Fitondram-panjakana aza.
Samy namoaka ny heviny, ny ahiahiny, ary ny fomba fandraisany ny tetikasa “Base Toliara” avokoa ireo solontena samihafa nanatrika ny fihaonana. Nifandimby nitondra ny fanazavana nilain’ny rehetra ny tomponandraikitra avy ao amin'ny Base Toliara, sy ireo Minisitra voakasiky ny tetikasa mivantana. Samy nahatsapa taorian’izany, fa maro ny fomba samihafa entin’ireo olona sasany mamadika tanteraka ny zava-misy, izay miteraka tsy fifankahazoana eo amin’ny samy Malagasy sy fironana any amin’ny lalan-diso. Rehefa nazava ny resaka, dia mipetraka ankehitriny ny tanjona iombonana, mba hisian'ny firaisankina, ny fifanomezan-tanana ary ny fandraisana andraikitra ka hanombohan’ny asa ao anatin’ny filaminana sy ny fitoniana. Nambaran’ny Praiminisitra fa ny dingana sy sehatra toy izao, dia fanoitra lehibe ho an’ny fampandrosoana. Nanao antso avo ny tenany noho izany, mba hisy ny fifanohanana eo amin’ny vahoaka sy ny tetikasa Base Toliara, ho fikatsahana hatrany ny tombontsoa iombonana.
𝑵𝒚 𝑺𝒆𝒓𝒂𝒔𝒆𝒓𝒂