ANTSO AVO IRAISAM-PIRENENA HO FANARENANA NY FAHASIMBANA VOKATRY NY RIVODOZA GEZANI: MCC

ANTSO AVO IRAISAM-PIRENENA HO FANARENANA NY FAHASIMBANA VOKATRY NY RIVODOZA GEZANI

𝑳𝒂𝒑𝒂𝒏’𝒊 𝑴𝒂𝒉𝒂𝒛𝒐𝒂𝒓𝒊𝒗𝒐[𝑭𝒂𝒉𝒂-14 𝑭𝒆𝒃𝒓𝒐𝒂𝒓𝒚 2026]Taorian’ny fahavoazana goavana nateraky ny fandalovan’ny rivodoza Gezani tany amin’ny Faritra Atsinanana sy ireo faritra maro hafa, dia nanao antso avo iraisampirenena ny Fitondram-panjakana Malagasy ho fanohanana maika ny asa fanarenana sy fanampiana ireo mponina traboina. Namaly izany antso izany ireo mpiara-miombon’antoka ara-teknika sy ara-bola, nandritra ny fihaonana ôfisialy notarihan'ny Praiminisitra, Lehiben'ny Governemanta, Rajaonarivelo Herintsalama Andriamasy, notanterahina tetsy amin’ny Minisiteran’ny Raharaham-bahiny, Anosy, androany. Nanotrona izany ireo mpikambana ao amin'ny Governemanta sy ireo solontena diplaomatika ary ny fikambanana iraisampirenena.Nandritra ny fivoriana, nanasongadina mazava ny Praiminisitra fa goavana ny fahasimbana ary tsy mbola ampy ny loharanom-bola sy ny fitaovana eo am-pelatanan’ny Fanjakana, hananganana ireo fotodrafitrasa rava sy hanohanana ny mponina very fananana. Nambarany tamin'izany fa ny fanarenana haingana sy mahomby no adidy voalohany, ary tsy maintsy miorina amin’ny firaisankina sy ny fiaraha-mientana amin’ny mpiara-miombon’antoka iraisampirenena izany. Porofon’ny fiarahana mijoro amin’i Madagasikara ny fanohanana asehon’ireo mpiara-miombon’antoka amin’izao fotoan-tsarotra izao, hoy izy.Nanome toky ny Praiminisitra fa hotantanina ao anatin'ny fangaraharana sy fahitsiana tanteraka ny fanampiana rehetra azo, ary tsy hisy ny fandeferana amin’izay manana eritreritra hanodina na hampiasa tsy araka ny tokony ho izy ny fanampiana natokana ho an’ny vahoaka. Marefo ny firenena amin'izao fotoana izao hoy izy, saingy vonona hanangana fotodrafitrasa maharitra sy hanavao ny toetsaina. Araka izany dia miantso ny rehetra hatrany ny tenany, haneho firaisankina sy samy handray andraikitra.𝗡𝘆 𝗦𝗲𝗿𝗮𝘀𝗲𝗿𝗮