𝑳𝒂𝒑𝒂𝒏'𝒊 𝑴𝒂𝒉𝒂𝒛𝒐𝒂𝒓𝒊𝒗𝒐[𝑭𝒂𝒉𝒂-24 𝒋𝒐𝒏𝒂 2025]Andro faharoa sady fanokafana ara-pomba ôfisialy ny fihaonana an-tampony momba ny fandraharahana eo amin'i Etazonia sy Afrika, andiany faha-17, eto Luanda Renivohitr'i Angola androany. Araka ny efa notaterina teto, dia manatrika izany aty an-toerana, misolo tena ny Filohan’ny Repoblika Andry Rajoelina ny Praiminisitra, Lehiben'ny Governemanta Ntsay Christian. Filoham-panjakana, Lehiben'ny Governemanta, tomponandraiki-panjakana ambony samihafa, sy mpampiasa vola avy amin'ny sehatra tsy miankina afrikana sy amerikana, ary manam-pahaizana maro samihafa no mandray anjara amin'ity fihaonana ity. 📌Nisy ireo adihevitra anaty “panels” maro mifantoka amin’ny fifampizarana traikefa sy paikady mahomby eo amin’ny fitrandrahana harena an-kibon’ny tany; fa indrindra ireo akora manan-danja stratejika, toy izany koa ny fitantanana mahomby, ary ny fandraisana andraikitry ny fanjakana mba hampivelatra ny fandraharahana. Nametraka mazava ny toeran’i Madagasikara araka ny vinan’ny Filohan’ny Repoblika ny Praiminisitra nandritra ny famelabelarana nataony. Notanisainy tamin'izany ireo dingana rehetra ataon'ny fitondram-panjakana malagasy amin'ny fampiroboroboana ny indostria, ny fampiodinana ny toekarana, ny fanomezana lanja ny harena an-kibon’ny tany ahafahana misarika ireo mpampiasa vola eo amin'ny sehatra tsy miankina nasiônaly sy vahiny, ny famoronana asa, ny fampitomboana ny sanda fanampiny amin’ireo loharanon-karena voajanahary eto amin’ny firenena amin’ny alalan’ny fanodinana sy ny famoronana asa famokarana, ny fampandrosoana ireo Faritra nananganana tetikasa maro.Tamin’izany no nanamafisany, fa mijoro hatrany ny fitondram-panjakana malagasy manoloana ireo fanamby mipetraka maneran-tany eo amin'ny tontolon'ny harena an-kibon’ny tany sy ny fitantanana maharitra azy ireny; ary koa ny fijerena ny maha olona, indrindra amin'ny ezaka rehetra hanamafisana ny fiaraha-miasa manasongadina izany eo amin’ny sehatra iraisampirenena.𝗡𝘆 𝗦𝗲𝗿𝗮𝘀𝗲𝗿𝗮